សំឡេងសន្តិភាព បង្កបរិយាកាសឱ្យសាលារៀនតាមតំបន់ជម្លោះអាចដំណើរការសិក្សាដោយស្នាមញញឹម

(ឧត្តរមានជ័យ)៖ នៅព្រឹកថ្ងៃសុក្រ ទី៣១ ខែតុលា ឆ្នាំ២០២៥ នាយក លោកគ្រូ អ្នកគ្រូ និងសិស្សានុសិស្សសាលាបឋមសិក្សាគោកប្រាសាទ ស្ថិតនៅសង្កាត់កូនក្រៀល ក្រុងសំរោង ខេត្តឧត្តរមានជ័យ រួមគ្នាសំអាតសាលារៀន ត្រៀមបើកបវេសនកាលឆ្នាំសិក្សាថ្មីឆ្នាំ២០២៥-២០២៦ ដែលនឹងធ្វើឡើងនៅថ្ងៃទី១ ខែវិច្ឆិកា ឆ្នាំ២០២៥។

សាលាបឋមសិក្សាគោកប្រាសាទជាសាលារៀនមួយកន្លែងដែលទាហានថៃ បានបាញ់ផ្លោងគ្រាប់កាំភ្លើងធំធ្លាក់ចូលទីធ្លាសាលាកាលពីថ្ងៃទី២៤ ខែកក្កដា ឆ្នាំ២០២៥។ មុនដំណើរការសិក្សានេះ អាជ្ញាធរបោសសំអាតមីន បានចុះមកបោសសំអាតអំបែងគ្រាប់ និងរាវរកយុទ្ធភ័ណ្ឌមិនទាន់ផ្ទុះរួចរាល់ហើយ ដើម្បីធានាសុវត្ថិភាពដល់សិស្ស។

ការសិក្សាជាតម្រូវការចាំបាច់សម្រាប់ផ្តល់ចំណេះដឹង និងបង្កើតបានធនធានមនុស្ស សំឡេងសន្តិភាពជាធាតុដ៏ចាំបាច់ញ៉ាំងឱ្យការសិក្សាដំណើរការទៅបាន។ លោកគ្រូ អ្នកគ្រូ និងសិស្សនៅសាលាជាយដែនមួយនេះ ប្រាថ្នាសំឡេងស្ងាត់គ្រាប់ សំឡេងសន្តិភាព ដើម្បីពួកគេអាចប្រៀន និងរៀនសូត្របាន៕

(សូមអានបន្ត)

ជំនួបជាមួយឧបនាយករដ្ឋមន្ត្រី ស៊ុន ចាន់ថុល, សមាជិកសភានៃរដ្ឋបាលខេត្តអុនតារីយ៉ូ គាំទ្រលើការរៀបចំវេទិកាវិនិយោគ និងពាណិជ្ជកម្ម កំឡុងពេលកិច្ចប្រជុំកំពូលហ្វ្រង់កូហ្វូនី នៅប្រទេសកម្ពុជា

(តូរ៉ុនតូ)៖ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នាព្រឹកថ្ងៃទី២៩ ខែតុលា ឆ្នាំ២០២៥ (ម៉ោងក្នុងតំបន់) បានអញ្ជើញជួបសម្តែងការគួរសម និងពិភាក្សាការងារជាមួយ លោកស្រី Caroline Mulroney សមាជិកសភានៃរដ្ឋបាលខេត្តអុនតារីយ៉ូ និងជារដ្ឋមន្ត្រីទទួលបន្ទុកកិច្ចការនិយាយភាសាបារាំង ព្រមទាំងជាប្រធានក្រុមប្រឹក្សាភិបាលរតនាគារខេត្តអុនតារីយ៉ូ ផងដែរ។

ជំនួបនេះបានប្រព្រឹត្តទៅក្នុងបរិយាកាសស្និទ្ធស្នាល ដោយភាគីទាំងពីរបានគូសបញ្ជាក់ពីសារៈសំខាន់នៃការពង្រឹង និងពង្រីកទំនាក់ទំនងរវាងកម្ពុជា និង ប្រទេសកាណាដា។

ជាកិច្ចចាប់ផ្តើម លោកឧបនាយករដ្ឋមន្ត្រី បានសម្តែងនូវអំណរគុណយ៉ាងជ្រាលជ្រៅទៅកាន់លោកស្រី សមាជិកសភា ចំពោះជំនួបសម្តែងការគួរសម និងពិភាក្សាការងារនាឱកាសនេះ ហើយ លោកក៏បានជម្រាបជូនអំពីចក្ខុវិស័យរបស់រាជរដ្ឋាភិបាលកម្ពុជា នីតិកាលទី៧ ជាពិសេស យុទ្ធសាស្ត្របញ្ចកោណ-ដំណាក់កាលទី១ ដែលផ្តោតលើការទាក់ទាញការវិនិយោដោយផ្ទាល់ពីបរទេស ការធ្វើពិពិធកម្មសេដ្ឋកិច្ច និងការកែលម្អបរិយាកាសធុរកិច្ច។

ឆ្លៀតក្នុងឱកាសនោះលោកឧបនាយករដ្ឋមន្ត្រីក៏បានលើកឡើងអំពីលទ្ធភាពសហការរៀបចំព្រឹត្តិការណ៍អមក្នុងទម្រង់ជាវេទិកាវិនិយោគ និងពាណិជ្ជកម្ម កំឡុងពេលកិច្ចប្រជុំកំពូលហ្វ្រង់កូហ្វូនីលើកទី២០ ដែលនឹងប្រព្រឹត្តទៅនៅខេត្តសៀមរាប ក្នុងខែវិច្ឆិកា ឆ្នាំ២០២៦ ខាងមុខ។ លោកឧបនាយករដ្ឋមន្ត្រី បានអញ្ជើញវិនិយោគិនពីខេត្តអុនតារីយ៉ូឱ្យមកស្វែងយល់ពីឱកាសវិនិយោគនៅកម្ពុជា លើវិស័យអាទិភាពនានា។

ជាការឆ្លើយតបលោកស្រី ក៏បានបង្ហាញនូវការកោតសរសើរចំពោះ វឌ្ឍនភាពដ៏គួរឲ្យកត់សម្គាល់របស់កម្ពុជា។ ក្នុងនាមជាប្រធានក្រុមប្រឹក្សាភិបាលរតនាគារខេត្តអុនតារីយ៉ូ លោកស្រីបានចែករំលែកបទពិសោធន៍ក្នុងការអនុវត្ត កំណែទម្រង់រដ្ឋបាលសាធារណៈ ការគ្រប់គ្រងហិរញ្ញវត្ថុប្រកបដោយប្រសិទ្ធភាព និងការលើកកម្ពស់តម្លាភាព ក្នុងវិស័យសាធារណៈនានា។ លោកស្រី ក៏បានសំដែងនូវការគាំទ្រលើការគិតគូររៀបចំ វេទិកាវិនិយោគ និងពាណិជ្ជកម្ម កំឡុងពេលកិច្ចប្រជុំកំពូលហ្វ្រង់កូហ្វូនីលើកទី២០ នៅប្រទេសកម្ពុជា។

តាមរយៈជំនួបនេះ បានឆ្លុះបញ្ចាំងឱ្យឃើញពីកាយវិការវិជ្ជមានមួយ ក្នុងការត្រួសត្រាយផ្លូវសម្រាប់ទំនាក់ទំនងកាន់តែជិតស្និទ្ធ និងកិច្ចសហប្រតិបត្តិការពាណិជ្ជកម្ម និងការវិនិយោគ ដែលហុចផលប្រយោជន៍ទៅវិញទៅមកសម្រាប់ប្រជាជាតិទាំងពី កម្ពុជា និងកាណាដា៕

(សូមអានបន្ត)

ប្រធានាធិបតី ដូណាល់ ត្រាំ ចាកចេញពីកូរ៉េខាងត្បូង និងបញ្ចប់ទស្សនកិច្ចនៅអាស៉ី ក្រោយជំនួបកំពូលជាមួយប្រធានាធិបតី ស៉ី ជីនពីង

(ប៊ូសាន)៖ នាថ្ងៃព្រហស្បតិ៍នេះ ប្រធានាធិបតីសហរដ្ឋអាមេរិក លោក ដូណាល់ ត្រាំ បានចាកចេញពីប្រទេសកូរ៉េខាងត្បូងហើយ ក្រោយបិទបញ្ចប់កិច្ចប្រជុំទ្វេភាគី ជាមួយប្រធានាធិបតីចិន លោក ស៉ី ជីនពីង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃព្រហស្បតិ៍ ទី៣០ ខែតុលា ឆ្នាំ២០២៥។

លោក ត្រាំ បានធ្វើដំណើរឡើងយន្តហោះ Air Force One ភ្លាមៗតែម្តង បន្ទាប់ពីបើកជំនួបទល់មុខគ្នាជាមួយលោក ស៉ី ជីនពីង ដែលជាលើកដំបូងក្នុងរយៈពេល៦ឆ្នាំ នៅឯទីក្រុង Busan នៃប្រទេសកូរ៉េខាងត្បូង។ ជំនួបខាងលើបានប្រព្រឹត្តទៅរយៈពេលប្រមាណជា១០០នាទី ហើយវាបានបិទបញ្ចប់ ដោយពុំទាន់មានការអត្ថាធិប្បាយជាសាធារណៈនៅឡើយ ជុំវិញថាតើមានសម្រេចបានវឌ្ឍនភាពដែរឬអត់ ពាក់ព័ន្ធបញ្ហាវិវាទពាណិជ្ជកម្មរវាងមហាអំណាចទាំងពីរ។

គួរបញ្ជាក់ថា តាមរយៈការចាកចេញពីប្រទេសកូរ៉េខាងត្បូង គឺលោក ត្រាំ បិទបញ្ចប់ជាស្ថាពរនូវដំណើរបំពេញទស្សនកិច្ចរយៈពេលប៉ុន្មានថ្ងៃមកនេះ នៅតំបន់អាស៉ី ដែលបានចាប់ផ្តើមតាំងពីថ្ងៃអាទិត្យចុងសប្តាហ៍មុន ហើយរួមមានទាំងការធ្វើទស្សនកិច្ចនៅម៉ាឡេស៉ី និងជប៉ុន។ ដោយឡែក ក្រោយជំនួបកំពូលជាមួយលោក ត្រាំ លោក ស៉ី ជីនពីង​នឹងបន្តស្ថិតនៅកូរ៉េខាងត្បូង ដល់ថ្ងៃសៅរ៍សប្តាហ៍នេះ ដើម្បីចូលរួមកិច្ចប្រជុំកំពូល នៃវេទិកាកិច្ចសហប្រតិបត្តិការសេដ្ឋកិច្ចអាស៉ី-ប៉ាស៉ីហ្វិក (APEC) ហើយបំពេញទស្សនកិច្ចផ្លូវរដ្ឋ៕

(សូមអានបន្ត)